ANTHENOR.
Invincible Empereur,
Permets qu'en quatre mots je te tire d'erreur,
Luciane, Seigneur, ne fut jamais ma fille,
Je n'eûs jamais d'enfans, je n'ay point de famille,
Et bien que nous ayons imité les Chrestiens,
Nous n'avons point pourtant d'autres Dieux que les tiens.
Tous ces noms supposez & de fils, & de pere,
Ses desirs simulez, & sa feinte colere,
N'estoient que des effets que nous avoit prescrits,
Ce traistre dont le change estonne nos esprits.
LUCIANE.
Non, Seigneur, si Genest contre nostre esperance,
A perdu le respect, & changé de creance,
Luy seul a faict son crime, & luy seul aujourd'huy,
En cette occasion doit respondre de luy,
Nous n'avons jamais pris de part en son audace,
Et nous n'en devons point avoir en sa disgrace,
Qu'il fasse l'insensé, l'insolent, le mutin,
Faut-il que son malheur change nostre destin?
Et devons nous icy passer pour ses complices,
Si nous n'avons jamais approuvé ses caprices?
Dez l'instant qu'il s'est mis du party des Chrestiens,
Nous avons separé nos interests des siens,
Et de ses passions nos ames desunies,
Ont plaint en mesme temps & blamé ses manies,
Condamné son orgueil, detesté sa fureur,
Et veû son insolence avec beaucoup d'horreur.
DIOCLETIAN.
De qui donc teniez vous ces coupables maximes,
Qui tantot des Chrestiens authorisoient les crimes?
LUCIANE.
D'un desir curieux qui ne te peut chocquer,
Puis que je ne l'avois qu'affin de m'en mocquer,
Et qu'encor aujourd'huy ces Illustres mensonges,
Passent dans mon esprit seulement pour des songes.
DIOCLETIAN.
Si tu repugnes tant aux abus des Chrestiens,
Fay nous voir des effets du discours que tu tiens,
Va t'en trouver Genest, & t'efforce d'abattre,
Par de vives raisons ce coeur opiniatre.
L'adresse de l'esprit jointe aux graces du corps,
Faict ordinairement d'admirables efforts:
Employe un peu tes yeux au secours de ta bouche,
Il n'est point de mutins qu'un bel objet ne touche;
Desja mon courroux cesse, & cede à tes attraits,
Fay que Genest encor en ressente les traits,
Et que son coeur vaincu par de si belles armes,
Nous rende redevable au pouvoir de tes charmes.