DIOCLETIAN.
Retourne, & sur le champ qu'on l'expedie aussi,
Delivre promptement Rome de cette peste
Avant qu'à nos Estats elle soit plus funeste.
Va.
RUTILE.
J'obey, Seigneur.
SCENE IV.
Diocletian. & suitte.
DIOCLETIAN.
Quoy donc ces enragez
Ayment mieux estre ensemble en public esgorgez,
Que d'adorer nos Dieux, que d'implorer ma grace,
Et parmy les douceurs d'une heureuse bonace
Vivre dans les plaisirs, les honneurs, & les biens?
Ha! Dieux, quelle fureur agite les Chrestiens?
Ils respandent leur sang, ils prodiguent leur vie,
Et dez qu'un faux espoir a charmé ces impies
Il n'est point de supplice, il n'est point de tourment
Qui les puisse tirer de leur aveuglement.
Si faut-il toutesfois ou dompter leur audace,
Ou jusques au dernier en esteindre la race.
Mais que veut Aquillin? il paroit tout esmeu.
SCENE V.
Diocletian. Aquillin. & suitte.