Ajax, Orestes, Saul, Nabuchodonosor devenus furieux.
Du temple de Diane bruslé par un fol.
Or à ceste heure il me semble que je voy ces saiges entrer en cholere, & eux armer de bourdes, pour avec leur prudence arguer & proposer que nulle chose est plus miserable que d'entrer en fureur & follie: Allegant là dessus les exemples de Ajax, Orestes, Saul, Nabuchodonosor devenus furieux. Ajax, de Orestes, de Saul, de Nabuchodonosor, & de plusieurs autres, lesquels pour estre devenus furieux & fols, ont tué leurs peres, bruslé villes & maisons, prins à force & violé leurs sœurs & consanguinaires, les religieuses & vierges: commis sacrileges, & infinis autres abominables crimes & execrables excez. Et n'oublieront pas aussi de parler de cestuy fol acariastre qui Du temple de Diane bruslé par un fol. brusla le temple de Diane en Ephese, l'un des sept spectacles plus renommez au monde, pensant avec un tel beau faict acquerir bruict, & soy faire immortel. Pour conclusion ils diront que l'une des plus grandes punitions que la Justice divine donne aux mauvais & vitieux: est de leur oster l'entendement, & les faire devenir fols & furieux: voulans sur le dernier de leur propos inferer, que ce mien tant maldire d'eux pour louer la Folie, est une mesme espece de maladie qui m'est advenue: Au moyen de quoy lon ne me doit prester ne audience ne croyance. Et en cest endroict se haulseront sur les ergots, & se feront glorieux, pensans avoir merité triomphe & gloire, comme s'ils avoyent opugné & gaigné une Babylone.
Diverses especes de folie.
Quelle est la folie dont l'autheur parle.
Platon.
La folie des Vaticinateurs & poetes.
Ausquels, sauf leur bonne grace, je responds, que tout ce qu'ils disent est tresveritable: mais aussi qu'ils sont grandement trompez & abusez, s'ils croyent qu'il n'y ait point de difference entre la Folie, & la folie dont il se trouve (selon l'opinion de frere Marian) Diverses especes de folie. innumerables especes: & entre les autres il y en a une, comme ceux cy veritablement jugent, laquelle est furieuse, terrible, bestiale & pleine de toute misere, semblable aux peines & tourments que les Furies infernalles ont accoustumé de donner pour chastier les ames damnees. Et de ceste là ne veux-je parler. Mais supplie la divine Clemence la vouloir dechasser & esloingner de nous, & l'envoyer pour ostage aux vitieux Turcqs & malheureux Payens. Quelle est la folie dont l'autheur parle. Celle que je traicte, & dont je parle, est à l'autre du tout differente & contraire: car elle est douce, amiable, joyeuse & plaisante, & à nous octroyee par don & grace des haults dieux, pour nous delivrer des griefves cures, solicitudes & molesties, & nous causer les voluptez & glorieux faicts que je vous ay cy dessus recitez. Platon. Ceste cy est tant de Platon estimee, qu'il conclud qu'en la vie humaine ne peult estre plus grand plaisir ne plus de delectation, que La folie des Vaticinateurs & poetes. la folie des Vaticinateurs & Poetes: c'est à sçavoir des Vaticinateurs, quand ils pensent prophetizer & predire les choses futures, comme s'ils les avoyent presentes: Et des Poetes, quand agitez de leur fureur ils font vers plust tost divins qu'humains. Et certes nulle chose se pourroit imaginer plus delectable, qu'est de non sentir les adversitez & joyr des plaisirs.
Response gentille d'un Florentin touchant la Folie.
Parquoy non sans juste occasion fut grandement loué le conseil, que donna un gentilhomme Florentin à la dame qui le prioit de luy enseigner les remedes, avec lesquels il s'estoit autrefois guary de la folie, àfin de pouvoir donner guarison à un sien fils unique qui estoit tombé en semblable inconvenient. A quoy Response gentille d'un Florentin touchant la Folie. le gentilhomme courtoisement respondit, Madame, pour Dieu ne cerchez point de priver vostre fils d'un si grand plaisir où maintenant il se retrouve: Car je n'eu oncques, & n'espere jamais avoir un meilleur temps que j'avois quand j'estois fol, pource que lors je ne sentois aucune fascherie ne molestie, joyssant des infinis plaisirs que continuellement la Folie amene avec soy.