Snìchele — Gaveveli insieme un foresto?
Padrona — Come gerelo?
Snìchele — Saverlo, siora Berta, come ch'el gera! El xe un omo grande ma mi no lo go mai visto.
Padrona — Questo gera picolo.
Snìchele — No fa gnente. E da che parte andaveli?
Padrona — Drio a le so gambe. Cossa vorìo, benedeto, che mi varda ste robe? I sarà andà in ciesa.
Snìchele (si volta e guarda la chiesa monumentale ch'è in faccia al caffè). — Sì pardia! I vien fora adesso. El ghe xe, el ghe xe, el foresto. Cossa fai? Par cossa se fermeli? Ah, i se spartisse, i se saluda. Xele scapelade! Cussì lo vedo pulito. Son contento perchè gera bramoso de vederlo. Ocio ch'el vien qua adesso, lu solo. Sì da bon ch'el vien qua! La vada a tor el mistrà, ela, siora Beta.
Padrona — Andemo, ja, nol seca.
Snìchele — Co ghe digo de andarlo a tore! Eccolo, st'altro. (Siede a un tavolino e si mette a leggere la Difesa).
X. (entra senza salutare e siede a un altro tavolino in faccia a quello occupato dal dottor Snìchele) — Un latte all'uovo.