Est honor et tumulis. Animas placate paternas,
Parvaque in extinctas munera ferte pyras.
Parva petunt Manes: pietas pro divite grata est
Munere; non avidos Stix habet ima Deos.
Tegula projectis satis est velata coronis,
Et sparsæ fruges, parcaque mica salis.
Inque mero mollita Ceres violaque solutæ;
Hæc habeat media testa relicta via.
Nec majora veto: sed et his placabilis umbra est.
Adde preces positis et sua verba focis[273].