[10] Pezzajuolo: venditore di pezze, stracci. Pizzajuolo poi è colui, che fa le pizze, specie di schiacciate.

[11] Mantechiglia, pomata, manteca.

[12] Potecaro (letteralmente Bottegajo) pizzicagnolo. Però, altro è potecaro ed altro è casadduoglio.

[13] 'Nzogna, sugna, strutto. Ha detto il Capasso:

Dàlle a 'sso ciuccio, dà, senza sparagno...

Tu mme lo puoje fà' muollo comm'a 'nzogna.

[X. bis.—'O GALLO E 'O SORECE]
(Variante raccolta in Avellino, nel Principato Ulteriore).

Nci steva 'na vota 'no gallo e 'no sorece. 'No juorno 'o sorece dicivo vicino 'ô gallo:—«Compà' gallo, nci volimo ì' a fà' 'na mangiata de noce 'ncopp'a chill' albero?»—«Come vuo' tu.»—E sse ne iettero tutti dui 'a sotta a chill' albero. 'O sorece ss'appizzicavo subbito subbito; e saglivo 'ncoppa; e accomminciavo a mangià'. 'O povero gallo accomminciavo a volà'; e vola e vola e mai non arrivava addò steva 'o sorece. Quanno vedde, ca no' nci steva speranza de putè' saglì', dicivo:—«Ohi compà' sorece, sa' che buò' fà'? menammenne una».—'O sorece jivo pe' nce ne menà' una e li cuglivo 'nfronte. Chillo povero gallo, co' 'a capo rotta, tutta chiena 'e sango, sse ne jiva addò' 'na vecchia:—«Zi' vecchia, dammi doje pezze, pe' mme sanà' 'sta capo».—«Si mmi dai dui pili, ti davo 'e pezze».—'O gallo sse ne jivo addò 'no cane:—«Cane, dammi pili; pili portare vecchia; vecchia dare pezze, pe' sanà' la capo mmia».—«Ssi mmi dai 'no poco 'e pane»—dicivo 'o cane—«io ti davo i pili».—'O gallo sse ne jivo a d' 'o fornaro:—«Fornaro dammi pane; pane dare cane; cane dare pili; pili portare vecchia; vecchia dare pezze, pe' sanà' la capo mmia».—«Sì?»—risponnivo 'o fornaro—«io ti deva 'o pane a te, senza ca tu mmi portàvi doje legne!»—'O gallo sse ne jivo a 'o bosco:—«Bosco, dammi doje legne; legne portare fornaro; fornare dare pane; pane dare cane; cane dare pili; pili portare vecchia; vecchia dare pezze, pe' sanà' la capo mmia».—'O bosco risponnivo:—«Si mmi puorti 'no poco d' acqua, ti davo doje legne».—'O Gallo sse ne jivo a 'na fontana:—«Fontana, dammi acqua; acqua portare bosco; bosco dare legne; legne portare fornaro; fornaro dare pane; pane dare cane; cane dare pili; pili dare vecchia; vecchia dare pezze, pe' sanà' la capo mmia».—'A fontana li divo l' acqua; l' acqua 'a purtavo 'ô bosco; 'o bosco li divo 'e legne; 'e legne 'e portavo 'ô fornaro; 'o fornare li divo 'o pane; 'o pane 'o portava 'ô cane; 'o cane li divo i pili; 'i pili 'e portavo 'â vecchia; 'a vecchia li divo 'e pezze; e 'o gallo ssi sanavo la capo ssoja. Cucurucù, no' nce n'è chiù.