Der bere von dem schalle ‖ durch die kuche geriet:
hey waz er kuchenknehte ‖ von dem viwer schiet!
vil kezzele wart gerüeret, ‖ zerfüeret manic brant:
hei waz man guoter spîse ‖ in dem aschen ligen vant!
Dô sprungen von dem sedele ‖ die hêrren und ir man.
der bere begunde zürnen: ‖ der künic hiez dô lân 10
allez daz gehünde ‖ daz an seilen lac.
und wær ez wol verendet, ‖ si heten vrœlîchen tac.
Mit bogen und mit spiezen ‖ (niht langer man daz lie)
dar liefen dô die snellen, ‖ dâ der bere gie.