dô was sô vil der hunde, ‖ daz dâ nieman schôz.
von des liutes schalle ‖ daz birge allez erdôz.
Der ber begunde vliehen ‖ vor den hunden dan:
im kunde niht gevolgen ‖ wan Kriemhilde man.
er erlief in mit dem swerte, ‖ ze tôde er in dô sluoc.
hin wider zuo dem viwre ‖ man den beren dô truoc.
Dô sprâchen die daz sâhen, ‖ er wær ein kreftic man.
die stolzen jeitgesellen ‖ hiez man ze tische gân.
ûf einen schœnen anger ‖ saz ir dâ genuoc.