Der rede was dô Hagne ‖ in sîme herzen hêr:
dô gab er in ir kleider ‖ und sûmte sich niht mêr.
dô si an geleiten ‖ ir wunderlich gewant,
dô sageten sim rehte ‖ die reise in Etzelen lant.
Dô sprach daz ander merwîp ‖ (diu hiez Siglint)
‘ich wil dich warnen, Hagne, ‖ Aldrîânes kint.
durch der wæte liebe ‖ hât mîn muome dir gelogen:
kumstu zen Hiunen, ‖ sô bistu sêre betrogen.
Jâ soltu wider kêren: ‖ daz ist an der zît;