dar inne ist ein verge, ‖ und nindert anderswâ.’
der mære der er vrâgte, ‖ der geloubet er sich dâ.
Dem ungemuoten recken ‖ sprach diu eine nâch
‘nu bîtet noch, er Hagene: ‖ jâ ist iu gar ze gâch.
vernemet noch baz diu mære, ‖ ir sult iuch wol bewarn,
und sult ouch mit dem vergen ‖ vil bescheidenlîchen varn.
Der ist sô grimmes muotes, ‖ der lât iuch niht genesen,
irn welt mit guoten sinnen ‖ bî dem helde wesen. 10
welt ir daz er iuch füere, ‖ sô gebet ir im den solt.
her hüetet disses landes ‖ unt ist Gelfrâte holt.