die ich ze dirre welte ‖ von ieman hân ervunden.
daz wolte got von himele, ‖ daz si mîne kamerære kunden!’
Dô sprâchen Hagenen helde ‖ ‘herre, lât vernemen.
nieman lebet sô siecher, ‖ im möhte wol gezemen
hœren sîne stimme, ‖ diu gêt ûz sînem munde.’
‘daz wolte got von himele’ ‖ sprach der künec, ‘daz ich si selbe kunde!’
Dô er drî dœne ‖ sunder vol gesanc,
alle die ez hôrten ‖ dûhte ez niht sô lanc. 10
si hætens niht geahtet, ‖ einer hende wîle,
obe er solte singen, ‖ daz einer möhte rîten tûsent mîle.