Si sprach ‘sô hôrte ich gerne, ‖ hâst dû daz vernomen,
sol von Tenemarke ‖ Hôrant here komen
mit den sînen helden, ‖ die mich in sorgen liezen?
den weiz ich alsô biderben, ‖ deich armiu maget sîn möhte wol geniezen.’
Dir kumt von Tenemarke ‖ Hôrant der neve dîn
ûf urliuge starke ‖ er und die recken sîn.
er sol daz Hilden zeichen ‖ tragen in sînen handen,
sô die Hegelinge ‖ koment zuo den Hartmuotes landen.’
Dô sprach aber Kûdrûn ‖ ‘kanst dû mir gesagen,
lebet noch Wate von Stürmen? ‖ sô wolte ich niht klagen. 10