dô hôrte man ûf den helmen ‖ swerte vil erdiezen.
die dâ bî in wâren, ‖ die mohte ir beider grimmes wol verdriezen.
Der Kûdrûnen vriedel ‖ under helme über rant
erreichte Ludewîgen ‖ mit ellenthafter hant.
er wundet in sô sêre, ‖ daz er niht mohte gestrîten.
dâ von muoste Ludewîc ‖ des grimmen tôdes dâ vor im erbîten.
Er sluoc im ander stunde ‖ einen vesten swanc,
daz des küneges houbet ‖ von der ahsel spranc. 10
er hete im wol vergolten, ‖ daz er was gevallen.
der künic was erstorben: ‖ des muosten schœniu ougen über wallen.