Thie dáti man giscríbe: ‖ theist mannes lúst zi líbe;
nim góuma thera díhta: ‖ thaz húrsgit thina dráhta.
Ist iz prósun slihti: ‖ thaz drénkit thih in ríhti;
odo métres kléini: ‖ theist góuma filu réini.
Sie dúent iz filu súazi, ‖ joh mézent sie thie fúazi,
thie léngi joh thie kúrti, ‖ theiz gilústlichaz wúrti.
Éigun sie iz bithénkit, ‖ thaz síllabạ in ni wénkit,
sies álleswio ni rúachent, ‖ ni so thie fúazi suachent;
Joh állo thio zíti ‖ so záltun sie bi nóti,
iz mízit ana bága ‖ al io súlih waga.