Mon chier seigneur, en grant coraige
Acompliray vostre ordonnance
Vers la pucelle bonne et saige;
Le cas luy diray en presence,
Je y vois, sans nulle difference,
Faire vostre commandement.
DIEU.
Que elle aye bonne fiance,
Sans soy esbayr nullement.
Pose d’orgues.—Et vient devers la Pucelle
gardant les brebiz de son pere et
queusant[49] en linge.
MICHEL.
Jeune pucelle bien eureuse,
Le Dieu du ciel vers vous m’envoye,
Et ne soyez de rien peureuse:
Prenez en vous parfaicte joye
Dieu vous mande, c’est chose vraye,
Que y vieult estre avecque vous,
Où vous soyez en quelque voye;
Si n’ayez point doncques de poux[50],
Sa voulenté et son plaisir
Est que vous aillez à Orleans,
Pour en faire Anglois saillir
Et lever le siège devant.
Se de vous sont contredisant,
En armes vous les convaincrez,
Ne contre vous ne seront puissans;
Mès de tout point les subjugrez.
Puis après, y vous conviendra
A Rains mener sacrer le Roy,
Que ainsi Dieu vous conduira,
Et Charles oster hors d’esmoy.
Combien qu’il ait beaucoup desroy[51]
Et pour le present fort à faire,
Dieu le fera paisible en soy,
Que il a ouy sa prière.
Et au seigneur de Baudricourt,
Vous luy direz que y vous maine
Incontinent, le chemin court,
Que il est vostre cappitaine,
Ainsi que c’est chose certaine.
Devers le Roy vous menera
En abit d’omme, toute seine,
Que Dieu toujours vous conduira.
LA PUCELLE.
Mon bon seigneur, que dictes vous?
Vous me faictes trop esbaye:
Cecy ne vient point à propoux,
En ce je ne sçay que je die.
Moy, povre pucelle ravye
Des nouvelles que vous me dictes,
Sachez, je ne les entend mie,
Que y me sont trop auctentiques.
Je ne vous pourroye respondre
Ainsi, moi, povre bergerete,
Vous qui cy me venez semondre.
Comme une simple pucelette,
Gardant es champs dessus l’erbete
Les povres bestes de mon pere,
Une jeune simple fillete,
Vous dis sont à mon bien contraire.
MICHEL ANGE.
Jehanne, ne vous en esmayez;
Que Dieu l’a ainsi ordonné,
Et veut que l’onneur vous ayez
Du royaulme, present fortuné,
Qui a esté habandonné
Par pechié commis des François;
Par vous sera roy couronné
Et remis en ses nobles drois.